ᐃᕗᔨᕕᒃ

ᐃᓄᐃᑦ ᓄᓇᓯᒪᕕᖃᓲᖑᖕᖏᑐᑦ ᑕᒃᑲᓂᑦᓭᓇᖅ ᓄᓇᓕᒻᒥ ᐃᓅᕕᖃᕐᓯᒪᔪᑦ ᑕᒪᑐᒥᖓ ᓄᓇᒥᒃ ᐊᕐᕌᒍᒐᓵᓗᓐᓂ 4000 ᒥᑦᓯᑎᓐᓃᑐᓂᒃ, ᑖᒃᑯᓇᓂ ᐊᕐᕌᒍᓂ ᓂᕿᑦᓴᖃᖃᑦᑕᓯᒪᑦᓱᑎᒃ ᓇᑦᓯᓂᒃ, ᐁᕕᕐᓂᒃ ᕿᓚᓗᒐᕐᓂᓗ, ᑖᒃᑯᓇᖕᖓᑦ ᓂᕿᑦᓴᖃᕐᐸᓱᑎᒃ, ᐊᓐᓄᕌᕐᑖᐸᑦᓱᑎᒃ, ᓴᓇᕐᕈᑎᑖᕐᐸᓱᑎᒃ ᐊᖏᕐᕋᖃᕐᓱᑎᓪᓗ. ᐃᒪᕐᐱᐅᑉ ᐃᖏᕐᕋᓂᖏᑦ ᑕᕆᐅᑉ ᐃᒪᖓᓄᑦ ᖁᐊᕈᑕᐅᒍᓐᓇᐸᖕᖏᑐᑦ, ᐊᕐᕌᒍᓕᒫᒥ ᐊᖑᓇᓱᕝᕕᐅᒍᓐᓇᓲᖑᓚᕿᑦᓱᑎᒃ. ᐊᐅᔭᐅᓕᕐᒪᑦ, ᕿᑭᕐᑌᑦ ᐱᐅᓕᑦᓯᓯᒪᓲᖑᔪᑦ ᐃᒪᕐᒥᐅᑕᑦᓴᔭᐅᑦᓱᑎᒃ ᑎᖕᒥᐊᓂᒃ.

ᐊᕐᕌᒍᖅ 1610-ᖑᑎᓪᓗᒍ, ᐊᓪᓚᑕᐅᒪᒋᐅᕐᑐᓂᒃ ᐅᓂᒃᑲᑕᐅᔪᖃᕐᓯᒪᕗᖅ ᐃᓄᑐᐃᓐᓇᓂᒃ ᖃᓪᓗᓈᓂ ᑲᑎᖃᑎᒌᓚᐅᕐᑐᕕᓂᕐᓂᒃ ᐃᕗᔨᕕᐅᑉ ᓵᖓᓂ ᕿᑭᕐᑕᓯᕐᒥ ᑌᑦᓱᒪᓂ ᕿᐊᓐᔨ ᖃᑦᓴᓐ ᑭᖑᓪᓕᐹᒥ (ᐃᓅᒍᓐᓀᓯᒪᔪᑦ) ᐅᑭᐅᕐᑕᑐᒧᑦ ᑎᑭᐅᑎᓱᖓᓚᐅᕐᑐᕕᓂᐅᓂᖓ. ᑭᓯᐊᓂ ᐊᕐᕌᒍᑦ 400 ᐊᓂᒍᕐᒪᑕ ᑭᓯᐊᓂ ᖃᑦᓴᓐ ᐯ ᑲᒻᐸᓂᒃᑯᑦ ᓂᐅᕕᕐᕕᑖᓚᐅᕐᑐᕕᓂᐅᔪᑦ ᐃᕗᔨᕕᒻᒥ. ᐊᕐᕌᒍᑦ ᐊᒥᓱᑦ ᐊᓂᒍᕐᒥᒪᑕ ᑲᑐᓕᒃᑯᑦ ᑐᑦᓯᐊᕕᖁᑎᒥᓐᓂᒃ ᓇᑉᐯᓕᕐᓂᒥᔪᑦ ᐊᕐᕌᒍᐃᓪᓗ 1940-ᓃᑦᑐᑦ ᐊᑐᕐᑐᑐᖃᐅᓕᕐᑎᓗᒋᑦ ᐃᓄᐃᑦ ᑕᒪᐅᖓ ᓄᓇᕙᓪᓕᐊᓯᓐᓂᖁᑦ. ᑲᑐᓕᒃᑯᑦ ᑐᑦᓯᐊᕕᖓᑦ ᐅᒃᑯᐊᑐᐊᖃᕐᒪᑦ, ᑲᕙᒪᑐᖃᒃᑯᑦ ᑲᒪᔨᐅ¯ᓯᓚᐅᕐᓯᒪᒋᕗᑦ, ᐃᓱᐊᖁᑎᓂᒃ ᓇᑉᐸᑎᕆᖃᑕᐅᓯᑦᓱᑎᒃ ᑭᖑᓂᐊᒍᑦ ᓄᓇᓕᖕᖑᓚᕆᓕᓚᐅᕐᓯᒪᔪᖅ. 1967-ᒥ, ᐃᓄᐃᑦ ᑯᐊᐸᑦᓴᒥᓂᒃ ᓇᑉᐯᒋᐊᖕᖓᓯᓚᐅᕐᓯᒪᒻᒥᔪᑦ.

ᐃᕗᔨᕕᒻᒥᐅᑦ ᓄᓇᓖᓐᓂ ᓴᓂᓪᓕᒋᓂᕐᐹᒥᓂᒃ ᐃᓚᖃᕐᓱᑎᒃ, 1975-ᒥ ᐊᑎᓕᐅᖃᑕᐅᒍᒪᓯᒪᖕᖏᑐᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᒃ, ᐃᓱᒪᖃᕐᓯᒪᒐᒥᒃ ᑖᒃᑯᓄᖓ ᐊᖏᖃᑎᒌᒍᑎᓄᑦ ᐃᓅᓯᕐᒥᓂᒃ ᐊᓯᑦᔨᑕᐅᒐᔭᕐᑐᒥᒃ. ᑌᒣᒃᑲᓗᐊᕐᑎᓗᒋᑦ ᐊᓯᖏᑦ ᐃᓄᐃᑦ ᐊᖏᕐᓯᒪᔪᑦ, ᑲᔪᓯᑎᑦᓯᓯᑦᓱᑎᒃ ᑯᐯᒃ ᑲᕙᒪᒃᑯᑦ ᑯᒑᓗᒻᒥᒃ ᐃᑯᒪᐅᑎᓕᐅᕐᓂᕆᓂᐊᓕᕐᑕᖓᓂᒃ ‘ᓚ ᑲᕌᓐᒥ’ ᔦᒥᓯ ᐯᒥᑦᑐᒥᒃ. ᑌᓐᓇ ᐃᓄᐃᑦ ᐊᖏᖃᑎᒌᕐᖃᔦᒪᓂᕆᓯᒪᔭᖓᑦ ᐊᓂᒍᕐᓯᒪᔪᑐᖃᐅᓕᕐᒥᔪᖅ ᐱᕙᓪᓕᐊᓂᐅᓯᒪᔪᓄᓪᓗ ᐃᓚᑐᐃᓐᓇᐅᓕᕐᒥᓱᓂ.

ᕿᑭᕐᑕᓯᖅ ᕿᒥᕐᕈᒋᐊᕐᑐᕋᑦᓴᐅᕗᖅ, ᐃᓄᑐᐃᓐᓀᑦ ᖃᓪᓗᓈᓂ ᑲᑎᓯᕕᒋᒋᐅᓚᐅᕐᑕᕕᓂᖓᑦ. ᕿᒥᕐᕈᓗᒋᑦ ᖃᑦᓴᓐ ᐯ ᑲᒻᐸᓂᒃᑯᑦ ᓂᐅᕕᕐᓂᐊᕕᖃᕐᕕᕕᓂᖓᓂᒃ ᑲᖏᕐᓱᑲᓪᓚᒥ, ᑕᒫᓂ ᐅᒥᐊᓕᑦᑕᖅ ᐱᐋᕐ ᓕᒧᐁᓐ ᑎ ᐃᐲᕐᕖᓪ ᓂᐅᕕᖃᑦᑕᓂᕐᒥᓗ ᓂᐅᕐᕈᒥᖃᑦᑕᓂᕐᒥᓗ ᐱᓇᓱᐊᕆᐊᖕᖓᓂᕐᖁᖅ 1697 ᐊᕐᕌᒍᖓᓂ.

ᐊᑦᔨᓕᐅᕐᑐᕕᓂᖅ/ᐊᑦᔨᓕᐅᑐᕕᓃᑦ: Frederick Marika Akello