ᑲᖏᕐᓱᔪᐊᖅ

1884 ᐊᕐᕌᒍᖓᓂ, ᖃᑦᓴᓐ ᐯ ᑲᒻᐸᓂᒃᑯᑦ ᐱᓇᓱᑦᑎᖏᓐᓄᑦ ᑎᑭᑕᐅᓚᐅᕐᑐᕕᓃᑦ ᑲᖏᕐᓱᔪᐊᑉ ᒥᑦᓵ, ᓄᕗᐊᓗᒻᒥ ᐊᕐᖁᓯᐅᕆᒐᓱᐊᕐᓱᑎᒃ ᑮᓇᐅᔭᓕᐅᕋᓱᐊᕐᑎᓄᑦ ᑕᕆᐅᕐᔪᐊᑉ ᐊᑭᐊᓄᑦ. ᑌᒣᑦᓱᑎᒃ ᓯᓚᓐᓂᐊᕕᒻᒥᒃ ᓇᑉᐯᓚᐅᕐᑐᕕᓃᑦ ᑲᖏᕐᓱᐃᑦ ᐃᓚᖓᓂ ᑲᔪᖏᕐᓭᒍᑎᒋᑦᓱᒍ ᑖᕙᓂ ᐃᓄᓐᓂᒃ ᓂᐅᕐᕈᓯᕐᖃᑦᑕᖁᔨᒧᑦ ᖃᓪᓗᓈᓄᑦ ᐱᓇᓱᐊᕆᐊᕐᑐᓯᒪᔪᓄᑦ, ᐃᓄᐃᑦ ᕿᓯᔭᕐᓂᒃ ᐳᐊᓗᓐᓂᒃ ᑲᒥᑐᐃᓐᓇᓂᓪᓗ ᑕᐅᕐᓯᐅᑎᖃᖃᑦᑕᑎᓪᓗᒋᑦ ᑐᐹᑭᓂᒃ ᖁᑭᐅᑎᓪᓗ ᐊᕐᔭᖏᓐᓂᒃ ᐱᑖᕐᑎᑕᐅᑦᓱᑎᒃ.

ᐊᕐᕌᒍ 1910-ᒍᓕᕐᑎᓗᒍ, ᒍᐃᒍᐃᒃᑯᑦ ᓂᐅᕕᕐᓂᐊᕕᒻᒥᒃ ᓇᑉᐯᓕᓚᐅᕐᑐᕕᓃᑦ ᓂᐅᕐᕈᓭᕕᒋᖃᑦᑕᓚᖓᔭᒥᓂᒃ ᑭᖑᓂᖓᒍᑦ ᐊᕐᕌᒍᐃᑦ ᓯᑕᒪᑦ ᓈᒻᒪᑕ ᖃᑦᓴᓐ ᐯ ᑲᒻᐸᓂᒃᑯᑦ ᓂᐅᕐᕈᓭᕕᑦᓴᒥᓂᒃ ᓇᑉᐯᓕᕐᓂᒥᔪᑦ. ᐊᑯᓂᐅᓪᓗᐊᖏᑦᑐᖅ ᐃᑦᓯᔭᕐᔪᐊᑯᑦ ᑐᑦᓯᐊᕕᖁᑎᒥᓂᒃ ᓇᑉᐯᓂᐊᕐᓕᕐᒥᒪᑕ ᓄᓇᓕᒻᒥ ᓯᕗᓪᓕᐹᑦᓯᐊᒥ ᐃᓕᓐᓂᐊᕕᒃ ᐋᓐᓂᐊᓯᐅᕐᕕᓗ ᓴᓇᔭᐅᓕᓚᐅᕐᓯᒪᒻᒥᔫᒃ. ᐊᖕᒃᓕᑲᒃᑯᑦ ᑐᑦᓯᐊᕕᖁᑎᒥᓂᒃ ᓇᑉᐯᓕᓚᐅᕐᓯᒪᒻᒥᔪᑦ 1963-ᒥ ᐊᒻᒪᓗ ᑲᖏᕐᓱᔪᐊᕐᒥᐅᑦ ᓄᓇᓕᖓ ᑯᐊᐸᒥᒃ ᓂᐅᕕᕐᕕᑖᓕᓚᐅᕐᓯᒪᒻᒥᔪᑦ 1970-ᒥ.

1961 ᐊᕐᕌᒍᖓᓂ ᑭᓯᐊᓂ ᓄᓇᓕᖓ ᐱᖁᔭᑎᒍᑦ ᓇᓗᓀᕐᑕᐅᓴᕋᑕᓕᓚᐅᕐᓯᒪᔪᖅ ᐃᓕᑕᕆᔭᐅᓂᕐᑖᑎᑕᐅᑦᓱᓂ ᐊᒻᒪᓗ ᓯᕗᓂᐊᒍᑦ ᐊᑦᓯᕋᕐᑕᐅᒍᑎᖃᖃᑦᑕᓯᒪᔪᖅ ᓭᓐᑦ-ᐋᓐ-ᑎ-ᒪᕆᑰ-ᖑᓂᕋᕐᑕᐅᓱᓂ, ᓇᓗᓀᕐᑕᐅᕋᑕᕋᒥ ᑲᕙᒫᐱᖕᖑᑕᐅᑦᓱᓂ ᑭᓯᐊᓂ ᐃᓄᒃᑎᑐᑦ ᑲᖏᕐᓱᔪᐊᒥᒃ ᐊᑦᓯᕋᕐᑕᐅᒍᑎᑖᕐᓯᒪᔪᖅ ᐊᕐᕌᒍᐃᑦ ᐊᒥᓱᓪᓗᐊᖏᑦᑐᑦ ᐊᓂᒍᕐᒪᑕ ᑭᓯᐊᓂ.

ᑲᖏᕐᓱᔪᐊᑉ ᓄᓇᓕᖓ ᐅᔭᕋᕐᓂᐊᕕᑦᓴᑕᓕᒻᒪᕆᐊᓘᑉ ᑲᑎᓂᐅᑉ ᑕᕐᕋᖓᓃᑦᑐᖅ. ᐅᔭᕋᕐᓂᐊᓂᐊᑏᑦ ᑖᕙᓂ ᑌᒪᖕᖓᓂᐊᓗᒃ ᐱᓇᓱᐊᖃᑦᑕᓯᒪᔪᐹᓗᐃᑦ ᑌᒪᖕᖓᓕᒫᕋᓗᐊᖕᖏᑑᒐᓗᐊᖅ 1950-ᐄᑦ ᐊᕐᕌᒍᖏᓐᓂᓂᑦ. ᐅᓪᓗᒥ, ᕌᒃᓚᓐᑯᑦ ᐅᔭᕋᕐᓂᐊᑎᖏᓐᓄᑦ ᓇᔪᕐᑕᐅᓲᖑᓕᕐᑐᖅ, ᓄᓇᕐᔪᐊᓕᒫᒥ ᑮᓇᐅᔭᑦᓴᔭᕐᑕᖃᕐᓱᓂ ᐊᑭᑐᔪᔭᐅᓂᕐᐹᓄᑦ ᐃᓚᒋᔭᐅᔪᒥᒃ ᐅᔭᕋᕐᓂᐊᕕᐅᓲᖅ, ᑲᖏᕐᓱᔪᐊᕐᒥᐅᓄᑦ ᐊᒥᓱᓄᑦ ᐱᓇᓱᒐᖃᕐᕕᐅᓲᖅ ᕌᒃᓚᓐ.

ᑲᖏᕐᓱᔪᐊᑉ ᓄᓇᓕᖓᑕ ᐊᕙᑖᓂ ᐊᒥᓱᒻᒪᕆᓐᓂᒃ ᓱᓇᓐᓂᐊᕋᑦᓴᑕᖃᕐᑐᖅ ᑕᑯᔭᑦᓴᓕᒻᒪᕆᐅᑦᓱᓂᓗ, ᐃᓄᓐᓄᑦ ᖃᓇᕐᑕᓕᐅᓂᕋᕐᑕᐅᔪᖅ ᑕᑯᔭᑦᓴᓄᑦ ᐃᓚᒋᔭᐅᒻᒥᔪᖅ ᒪᕐᕈᐃᓕᖓᑦᓱᓂ ᑲᖏᕐᓱᑯᑖᖅ, ᖃᕐᖃᔪᐊᕌᓗᓐᓂᒃ ᐊᑭᓐᓇᖃᕐᓱᓂ. ᐅᖓᓯᑦᑑᖏᑦᑐᒥᓪᓗ ᕿᑭᕐᑖᓗᒥᒃ ᖃᔭᕐᑕᓕᒻᒥᓗ ᐃᑦᓴᓂᑕᕐᕕᐅᓲᕐᑕᖃᕐᓱᓂ ᐃᓄᕐᖄᕕᓃᑦ ᓯᕗᓪᓕᕕᓂᖏᓐᓄᑦ ᐅᔭᕋᕐᓂ ᑮᓇᖕᖑᐊᑦ ᓴᓇᖕᖑᐊᑕᐅᓚᐅᕐᑐᕕᓂᐅᑎᓪᓗᒋᑦ ᐊᕐᕌᒍᐃᑦ 1,200-ᒐᓚᐅᕐᖂᑐᑦ ᐊᓂᒍᓕᕐᑐᑦ. ᑕᑯᑦᓴᐅᒥᔪᑦ ᖃᕐᒪᕕᓃᑦ ᐃᓄᕐᖄᕕᓃᑦ ᑭᖑᓪᓕᕕᓂᖏᓐᓄᑦ ᓴᓇᐅᔭᐅᖃᑦᑕᓚᐅᕐᑐᕕᓃᑦ, ᐊᕐᕌᒍᐃᑦ 800 ᐊᓂᒍᕐᓯᒪᓕᕋᓗᐊᕐᑎᓗᒋᑦ ᑕᑯᑦᓴᐅᓲᖑᖏᓐᓈᑐᑦ. ᑲᖏᕐᓱᔪᐊᒥ ᐆᒪᔪᐃᑦ ᐅᑭᐅᕐᑕᑐᒧᐊᓲᑦ ᑕᑯᔮᕐᑐᕋᑦᓴᐅᒥᔪᑦ.

ᐊᑦᔨᓕᐅᕐᑐᕕᓂᖅ/ᐊᑦᔨᓕᐅᑐᕕᓃᑦ : Lucasi Kiatainaq