ᑲᖏᕐᓱᒃ

ᑲᖏᕐᓱᒧᑦ ᐅᖓᓯᑦᑑᔭᒐᑎᒃ ᕿᑭᕐᑌᑦ ᐊᒻᒪᓗ ᑭᔭᐅᑉ ᑲᖏᕐᓱᖓᑦᑕ ᑕᓯᕐᔪᐊᕈᓯᖓ ᒥᑎᕐᓄᑦ ᐃᕙᕕᐅᒋᐊᕐᑐᓲᑦ ᐊᕐᕌᒍᑕᒫᑦ. ᐃᓄᑐᐃᓐᓀᑦ ᐊᕐᓇᖏᑦ ᑖᒃᑯᓇᓂ ᖁᓂᕈᕐᑕᓲᑦ, ᐊᑎᒋᓕᐊᒥᓄᑦ ᖁᓂᕈᑦᓴᓂᒃ ᐳᑯᓲᑦ ᕿᐅᔭᕐᓇᖏᑦᑐᓯᐊᕌᓗᓐᓂᒃ ᐅᑭᐅᕌᓗᓕᑐᐊᕐᒪᑦ ᐊᑎᒋᓕᐅᕐᓲᑦ.

ᐊᒥᓱᐃᑦ ᐃᓄᐃᑦ ᓄᓇᓕᖏᑦᑎᑐᑦ ᑯᐯᒃ ᑕᕐᕋᖓᓂ, ᑲᖏᕐᓱᒃ ᓄᓇᓕᖕᖑᓚᐅᕐᓂᒥᔪᖅ ᓂᐅᕕᕐᓂᐊᕖᑦ ᓄᓇᓯᒪᕕᖏᓐᓂ. ᒍᐃᒍᐃᒃᑯᑦ ᓄᓇᖓᓂᒥᐅᔦᑦ ᓇᑉᐯᓚᐅᕐᑐᕕᓃᑦ ᓂᐅᕕᕐᓂᐊᕕᒻᒥᒃ 1921-ᖑᑎᓪᓗᒍ ᐊᒻᒪᓗ, ᑭᖑᓂᖓᒍᑦ ᐊᕐᕌᒍᐃᑦ ᓯᑕᒪᑦ ᐊᓂᒍᕐᒪᑕ, ᖃᑦᓴᓐ ᐯ ᑲᒻᐸᓂᒃᑯᑦ ᓂᐅᕕᕐᓂᐊᕕᑦᓴᒥᓂᒃ ᓇᑉᐯᓕᓚᐅᕐᓂᒥᔪᑦ, ᑕᒪᕐᒥᓗ ᓂᐅᕕᕐᓂᐊᕖᒃ ᐃᖏᕐᕋᑎᑕᐅᕙᓪᓗᖃᑦᑕᓯᒪᑦᓱᑎᒃ ᐊᐅᓚᑕᐅᑦᓱᑎᒃ ᐃᓄᓐᓄᑦ. ᑲᕙᒪᑐᖃᒃᑯᑦ ᐃᓕᓐᓂᐊᕕᖓ ᐅᒃᑯᐃᑕᐅᓕᓚᐅᕐᓂᒥᔪᖅ 1959-ᖑᑎᓪᓗᒍ, ᑌᒪ ᐃᓄᐃᑦ ᑖᕙᓂ ᓄᓇᓯᒪᕙᓪᓕᐊᓯᑐᐃᓐᓇᓂᐊᕐᓕᒪᑕ. 1961-ᖑᓕᕐᑎᓗᒍ ᑲᕙᒪᑐᖃᒃᑯᑦ ᐃᓗᓯᓕᕆᕕᑦᓴᒥᒃ ᓄᐃᑦᓯᓕᓚᐅᕐᓯᒪᒻᒥᔪᑦ, ᐃᓄᐃᓪᓗ ᐃᓪᓗᔪᐊᑦᓴᖏᓐᓂᒃ ᓈᑉᐸᑎᕆᓯᑦᓱᑎᒃ ᐃᓅᓯᓕᕆᓂᕐᒧᑦ ᐱᒍᑦᔨᒍᑎᑦᓴᓂᒃ ᓄᓇᓕᒻᒥ, ᑌᒣᓕᑐᐊᕐᒪᑕᓗ ᓄᓇᓕᒃ ᐊᖏᓕᕙᓪᓕᐊᓯᑐᐃᓐᓇᓚᐅᕐᑐᕕᓂᖅ. 1965-ᖑᓕᕐᑎᓗᒍ ᐊᖕᒃᓕᑲᒃᑯᑦ ᑐᑦᓯᐊᕕᒻᒥᒃ ᐅᒃᑯᐃᓯᓕᓚᐅᕐᓯᒪᒻᒥᔪᑦ ᑲᖏᕐᓱᒥ ᐊᒻᒪᓗ ᑯᐊᐸᐅᑉ ᓂᐅᕕᕐᕕᖓ ᓇᑉᐸᑕᐅᓂᐊᓕᕐᒥᒪᑦ ᑭᖑᓂᐊᐱᑐᐃᓐᓇᖓᒍᑦ. 1981-ᒥ ᑲᖏᕐᓲᑉ ᓄᓇᓕᖓ ᓇᓗᓀᒃᑯᓯᕐᑕᐅᓂᖃᕐᓯᒪᔪᖅ ᑲᕙᒫᐱᖕᖑᑕᐅᑦᓱᓂ.

ᑕᑯᔭᕐᑐᕋᑦᓴᐅᕗᖅ ᑲᖏᕐᓲᒃ ᑯᖓ, ᑎᓂᑦᑕᒪᕆᓲᖑᓂᖓ ᐅᓕᑦᑕᓂᖃᒻᒪᕆᓲᖑᓂᖓᓗ ᖃᐅᔨᒪᔭᐅᑦᓯᐊᑐᖅ ᐊᒻᒪᓗ ᐅᕕᓗᕐᑕᕕᑦᓴᒪᕆᕌᓘᒋᐊᖓ ᖃᐅᔨᒪᔭᐅᓂᖃᕐᒥᓱᓂ. ᐊᒥᓱᑲᓪᓛᓗᐃᑦ ᑕᓰᑦ ᑰᓪᓗ ᐃᖃᓗᑉᐱᓂᐊᕐᕕᓴᐅᕗᑦ ᐃᓯᐅᕋᓕᕐᑖᓂᓪᓗ ᐊᒥᒐᖕᖏᑐᓂᒃ. ᐆᒪᔪᐃᑦ ᑕᑯᔭᐅᒍᓐᓇᓲᖑᒻᒥᔪᑦ ᕿᓚᓗᒉᑦ, ᓇᑦᓰᑦ, ᑐᑦᑐᐃᑦ ᐊᒻᒪᓗ ᐊᓯᖏᑦ ᐊᒥᓱᐸᐅᔮᓗᐃᑦ ᐊᑦᔨᒌᖕᖏᑑᑦᓱᑎᒃ ᑎᒻᒥᐊᑦ. ᐃᑦᓴᓂᕐᑕᕐᓂᒃ ᐱᑕᖃᕐᒥᔪᖅ ᑲᖏᕐᓱᒧᑦ ᐅᖓᓯᑦᑑᔭᖏᑦᑐᖅ ᐸᒥᐅᖅ ᕿᑭᕐᑕᖓᓂ ᑕᑯᓴᑦᓴᑕᓕᒃ ᐃᓪᓗᑯᑖᓂᐊᓘᕙᓗᑦᑐᓂᒃ ᐃᑦᓴᓂᑕᕐᓂᐊᑎᓄᑦ ᑕᕆᐅᑉ ᐊᑭᐊᓂ ᐱᓯᒪᔪᓄᑦ ᑌᑦᓱᒪᓂᑖᓗᓂᕐᓴᓄᑦ ᖃᓪᓗᓈᑎᑐᑦ ᕓᑭᖕᖑᓂᕐᕋᕐᑕᐅᔪᓄᑦ ᓴᓇᐅᔭᓯᒪᓂᖕᖒᕆᔭᐅᔪᑦ ᐃᑦᓴᓂᑕᕐᓂᐊᑎᓄᑦ, ᕿᓂᕐᑎᓄᑦ ᑕᒪᐅᖕᖓᖄᓚᐅᕐᑐᕕᓂᕐᓄᑦ ᓇᔪᕐᑕᐅᑫᓐᓇᓯᒪᓂᐊᖕᖒᕆᔭᐅᔪᖅ 1100 ᐊᕐᕌᒍᖏᓐᓂ.