ᓴᓪᓗᐃᑦ

ᓴᓪᓘᓂᕋᕐᑕᐅᒐᓗᐊᕐᓱᓂ ᓄᓇᓕᖓ, ᐆᒪᔪᓕᒻᒪᕆᐊᓘᓲᖅ ᐊᒻᒪᓗ ᐅᑭᐅᕐᑕᑐᒥ ᐱᕈᓲᓂᒃ ᐱᕈᕐᑐᑕᖃᒻᒪᕆᓲᒍᑦᓱᓂ, ᓯᓚᐅᑉ ᐊᓯᑦᔨᑲᑦᑕᓲᖑᒍᓂᖓ ᐃᓱᒪᒋᑦᓱᒍ ᐅᓂᒃᑳᑕᐅᖃᑦᑕᓯᒪᔪᐃᓪᓗ ᐃᓱᒪᒋᑦᓱᒋᑦ, ᑌᑦᓱᒪᓂᐊᓗᒃ ᐃᓄᐃᑦ ᐅᖃᐅᓯᔭᐅᖃᑦᑕᓚᐅᕐᓂᕋᒥᒃ ᑖᕙᓐᓇ ᐆᒪᔪᓕᐊᓗᓂᕋᕐᑕᐅᑎᓪᓗᒍ, ᑭᓯᐊᓂ ᐆᒪᔪᐃᓐᓂᐊᑐᐊᓗᓚᕐᑐᕕᓃᑦ ᑖᕗᖓ ᑎᑭᑦᓱᑎᒃ ᐱᕐᓕᖃᔭᓚᐅᕐᑐᕕᓃᑦ. ᐅᓪᓗᒥᐅᓕᕐᑐᓕ ᑭᓯᐊᓂ ᓴᓪᓗᒥᐅᑦ ᓂᕿᑦᓴᖃᑦᓯᐊᑐᒻᒪᕆᐊᓘᓱᖑᓕᕐᑐᑦ ᐅᕕᓗᕐᓂᒃ, ᐊᒻᒨᒪᔪᓂᒃ, ᐃᖃᓗᑉᐱᓂᒃ, ᑐᒃᑐᓂᒃ, ᐸᐅᖕᖓᓂᒃ, ᐱᕈᕐᑐᐃᓗ ᐊᒫᖏᓐᓂᒃ ᐊᒻᒪᓗ ᒪᒪᓪᓗᖁᑎᑦᓴᔭᓂᒃ.

1958-ᒥ, ᐃᑦᓴᓂᑕᕐᓂᐊᑏᑦ ᓴᒡᒐᐸᓪᓕᐊᓯᓚᐅᕐᓂᒪᑕ ᕿᑭᕐᑕᒥ ᓴᓪᓗᐃᑦ ᑲᖏᕐᓱᑯᑖᖓᑕ ᐹᖓᓂ, ᐃᓄᕐᖄᕕᓃᑦ ᓯᕗᓪᓕᕕᓂᖏᑦ ᑖᕙᓂᑉᐸᑐᕕᓂᐅᒋᐊᖏᑦ ᓱᕐᖁᐃᑕᐅᓯᒪᔪᑦ ᐃᒻᒪᖄ 800 ᐊᕐᕌᒍᐃᑦ Xᔅᑑᓯᐅᑉ ᐃᓅᓕᕐᕕᖓᑕ ᓯᕗᓂᖓᓂ ᑎᑭᑦᓱᒍ 1000 ᐊᕐᕌᒍᐃ Xᔅᑑᓯ ᑐᖁᑕᐅᓯᒪᓕᕐᑎᓗᒍ.

ᐊᑦᔨᒌᖕᖏᑐᑦ ᓂᐅᕈᓭᔩᑦ ᐊᒻᒪᓗ ᓂᐅᕈᓭᔩᑦ ᓂᐅᕕᕐᕕᖁᑎᖏᑦ ᐊᕐᖁᓵᓗᑭᖃᑦᑕᓯᒪᔪᑦ ᓄᓇᕕᓕᒥ ᐊᔪᕐᓴᓂᕐᔪᐊᕌᓗᓪᓗ ᑎᑭᐅᑎᒻᒪᑦ ᐆᒪᔪᕕᓃᑦ ᐊᒥᖏᑦ ᒥᕐᖁᓖᑦ ᐊᑭᖏᑦ ᑲᑕᒻᒪᕆᓚᐅᕐᑐᕕᓃᑦ. ᐊᔪᕿᕐᑐᐃᔩᑦ ᐃᑲᔪᕐᓯᒪᒋᐊᓪᓚᒋᐊᖃᓚᐅᕐᑐᕕᓃᑦ ᓄᓇᓕᓐᓂᒃ ᐊᓐᓇᑎᑦᓯᒐᓱᐊᕐᓱᑎᒃ, ᐃᓕᓐᓂᐊᕕᓕᐅᕐᓱᑎᒃ ᑭᖑᓂᖓᒍᓪᓗ ᑲᕙᒪᒃᑯᑦ ᐱᑦᔪᔨᒍᑎᖏᑦ ᓄᐃᑕᐅᓂᐊᓕᕐᒥᒪᑕ. ᑌᒣᓕᕐᒪᑕ ᐃᓄᐃᑦ ᓴᓪᓗᐃᑦ ᒥᑦᓯᓕᒫᖓᓂ ᓄᓇᓖᑦ ᓄᓇᕙᓪᓕᐊᓯᓚᐅᕐᑐᕕᓃᑦ ᑖᕙᓂ.

ᓴᓪᓗᐃᑦ ᐁᑉᐯᖑᓂᕋᕐᑕᐅᔪᖅ ᖃᐅᔨᒪᔭᐅᒍᑎᖃᕐᐳᖅ ᒪᙯᕝᕕᓯᐊᖑᒋᐊᖓ ᐃᖃᓗᓐᓂᐊᕕᑦᓯᐊᖑᒋᐊᖓᓗ. ᓴᓪᓗᐃᑦ ᑲᖏᕐᓱᑯᑖᖓ ᓯᓚᒦᒋᐊᒥᒃ ᐊᓕᐊᒋᔭᓕᓐᓄᑦ ᑕᑯᒥᓇᕆᔭᒻᒪᕆᑦᑐᖅ ᓄᓇᖓ ᐱᕈᕐᑐᖃᑦᓯᐊᓲᒍᒻᒪᑦ.

ᐊᑦᔨᓕᐅᕐᑐᕕᓂᖅ/ᐊᑦᔨᓕᐅᑐᕕᓃᑦ : Anne-Renée Delli Colli