ᓴᓂᑭᓗᐊᖅ

ᐃᓄᐃᑦ ᐊᕐᕌᒍᒐᓵᓗᓐᓂᒃ ᐅᓄᕐᑐᓂ ᕿᑭᕐᑕᓂ ᓄᓇᖃᓲᑐᖃᐅᔪᑦ. ᑖᒃᑯᐊ ᕿᑭᕐᑌᑦ ᐅᑭᐅᕐᑕᑐᓪᓚᕆᐊᓘᒻᒪᑕ; ᓇᐹᕐᑐᓄᑦ ᐱᕈᕐᕕᐅᓚᐅᕐᓯᒪᑦᔭᖏᑦᑐᑦ. ᑐᓂᕐᖄᕕᓃᑦ ᐃᓄᑐᐃᓐᓀᓗ ᓯᕗᓪᓕᕕᓂᖏᑦ ᑖᒃᑯᓇᓂ ᕿᑭᕐᑕᒥᐅᒍᕙᑦᑐᕕᓂᐅᓂᖏᓐᓂᒃ, ᐊᒥᓱᐃᑦ ᐃᑦᓴᓂᑕᕐᓂᐊᕕᐅᓯᒪᔪᐃᑦ ᓱᕐᖁᐃᓇᕐᑎᓯᔪᑦ. ᕿᑭᕐᑌᑦ ᓯᓚᑖᓂ ᐱᓯᒪᔪᓄᑦ ᖃᐅᔨᒪᔭᐅᓚᐅᕐᓂᖏᑦᑐᑦ ᑕᑯᔭᐅᒐᒥᒃ ᑭᓯᐊᓂ ᕿᐊᓐᔨ ᖃᑦᓴᓐᒧᑦ ᖃᐅᔨᔭᐅᓚᐅᕐᑐᕕᓃᑦ ᕿᑭᕐᑌᑦ ᐃᓄᑦᑕᖃᕆᐊᖏᑦ 1610-ᒍᑎᓪᓗᒍ. ᐊᕐᕌᒍᐃᑦ 200 ᐊᓂᒍᕐᒪᑕ ᑭᖑᓂᖓᒍᑦ, 1840 ᐊᕐᕌᒍᖏᓐᓂ ᑖᒧᔅ ᒍᐃᑲᓐ, ᖃᑦᓴᓐ ᐯ ᑲᒻᐸᓂᒃᑯᓂ ᐱᓇᓱᑦᑎ, ᑕᑯᔭᐅᓚᐅᕐᓯᒪᖕᖏᑐᓂᒃ ᕿᓂᕐᑐᓂᒃ ᓯᕗᓕᕐᓱᓂ ᒣᓚᓯᒃᑯᓂ ᐱᑦᓱᑎᒃ (ᓯᓵᓯᐱᒥᑦ) ᕿᑭᕐᑕᓅᓕᓚᐅᕐᓂᒥᔪᑦ. ᕌᐳᑦ ᕙᓛᔪᑎ ᐊᒻᒪᓗ ᐱᓇᓱᖃᑎᖏᑦ ᓯᕗᓪᓕᐸᐅᑦᓱᑎᒃ ᐅᑭᐅᕐᓯᐅᓕᓚᐅᕐᓂᒥᔪᑦ ᕿᑭᕐᑕᓂ ᐊᕐᕌᒍᐃᑦ 75 ᐊᓂᕈᕐᓯᒪᓕᕐᒥᑎᓪᓗᒋᑦ.

ᓴᓂᑭᓗᐊᒥ ᖁᓪᓕᓴᔭᓂᒃ ᓴᓇᐅᒐᕐᑎᖏᑦ (ᓴᓇᖕᖑᐊᑎᖏᑦ) ᓯᓚᕐᔪᐊᓕᒫᒥ ᖃᐅᔨᒪᔭᐅᒍᑎᖃᕐᑐᑦ ᕿᕐᑎᑕᒻᒪᕆᐊᓗᓐᓂᒃ ᐅᔭᕋᕐᓂᒃ ᓴᓇᐅᒐᓲᒍᓂᖏᓐᓄᑦ, ᑖᕙᓐᓇ ᑌᒣᑦᑐᓂᒃ ᖁᓪᓕᓴᔭᓂᒃ ᐱᑕᓕᐊᓗᒻᒪᑦ. ᓴᓂᑭᓗᐊᒥᐅᑦ ᖃᐅᔨᒪᔭᐅᒍᑎᖃᑦᓯᐊᒥᔪᑦ ᐱᐅᔪᐊᓗᓐᓂᒃ ᐃᕕᒐᓕᐅᓲᒍᒻᒥᒪᑕ ᐊᕐᓀᑦ, ᐃᕕᒐᓕᐅᕐᓂᒥᓪᓗ ᐅᑎᕐᑎᓯᑦᓴᒉᓐᓇᓯᒪᑦᓱᑎᒃ.

ᓴᓂᑭᓗᐊᖅ ᖃᔭᕆᐊᕐᑐᕕᑦᓴᓯᐊᕌᓗᒃ, ᐃᒪᕐᐱᒥᓪᓗ ᖃᔭᕐᑐᕕᑦᓴᓯᐊᒍᑦᓱᓂ, ᒪᓂᕋᑐᐃᓐᓇᑯᓪᓗ ᓯᑐᕋᐅᑎᔭᕐᕕᓴᑦᓯᐊᒍᑦᓱᓂ ᓯᑮᓄᑦ ᐊᒻᒪᓗ ᐅᖓᓯᑦᑐᒧᑦ ᐱᓱᕋᔮᕐᕕᓴᑦᓯᐊᒍᑦᓱᓂ. ᓄᓇᓕᒻᒥᐅᑦ ᒪᙯᑦᑎᓯᔩᑦ ᐅᒥᐊᕐᑐᑎᑦᓯᓲᒍᒻᒥᔪᑦ, ᖃᔭᕐᑐᑎᑦᓯᓱᑎᓪᓗ ᐊᒻᒪᓗ ᓯᑭᑑᒃᑯᑦ ᒪᙯᑦᑎᓯᓲᒍᑦᓱᑎᒃ, ᐊᕐᕌᒍᓕᒫᒥ ᐊᖁᐃᒪᑎᑦᓯᓂᖃᓲᒍᑦᓱᑎᓗ (ᐊᐅᔭᒃᑯᑦ ᑐᐱᕐᓯᒪᑦᓱᑎᒃ, ᐅᑭᐅᒥᓗ ᐊᐳᑎᒥᒃ ᐃᓪᓗᒥᑦᓱᑎᒃ). ᕿᑭᕐᑖᕈᓂᕐᓭᑦ ᐊᒥᓱᓄᑦ ᑎᒻᒥᐊᓄᑦ ᒥᑎᕐᓄᑦ ᓂᕐᓕᓄᓪᓗ ᒪᓐᓂᓕᐅᕐᕕᐅᓲᒍᒻᒪᑕ ᐅᓪᓗᖃᕐᒥᐅᓱᑎᒃ ᑕᑯᓐᓇᐅᔮᕆᐊᕐᑐᕕᑦᓴᓯᐊᒍᓲᑦ. ᑕᓯᐅᔭᕐᓗ ᐊᔪᒉᑦᑐᒥᒃ ᑎᓂᓐᓂᖃᓲᒍᒻᒪᑦ, ᒪᙯᑦᑎᓯᔪᐃᑦ ᐱᐅᔪᐊᓗᓐᓂᒃ ᐊᔪᒉᑦᑐᓂᒃ ᑕᑯᔭᕐᑐᑎᑦᓯᓲᑦ ᐊᒻᒪᓗ ᓯᓚᕐᔪᐊᓕᒫᒥ ᐱᐅᓂᕐᐹᓂᒃ ᐃᖃᓗᓐᓂᐊᑎᑦᓯᓂᖃᓲᒍᒻᒪᑕ.

ᐊᑦᔨᓕᐅᕐᑐᕕᓂᖅ/ᐊᑦᔨᓕᐅᑐᕕᓃᑦ: Joel Heath - Arctic Eider Society