ᓯᑦ-ᓯᐊᓪ

ᑖᕙᓂ ᓄᓇᓯᒪᕐᖄᑐᕕᓃᑦ ᐃᓗᕐᕈᓯᖃᑎᒌᑦᓴᔭᐅᓯᒪᖕᖏᑐᑦ, ᖃᐅᔨᒪᔭᐅᒍᑎᖃᕐᓱᑎᒃ ᑌᑦᓱᒪᓂᐊᓗᒃ ᒨᑕᖕᓀᒍᑦᓱᒃ ᐃᓅ-ᒍᓂᕋᕐᑕᐅᓯᒪᔪᐃᑦ ᐊᓪᓓᑦ, ᑖᕙᑦᓱᒥᖓᓗ ᓄᓇᒥᒃ ᐅᐊᓵᑦ-ᒍᓂᕃᑦᓱᑎᒃ (ᑲᖏᕐᓱᔪᐊᖅ). ᑌᒃᑯᐊ ᓯᕗᓪᓕᐹᑦᓯᐊᒍᑦᓱᑎᒃ ᑲᑎᓯᕐᖄᓚᐅᕐᑐᕕᓃᑦ ᔭᐅᒃ ᑳᕐᓰᒥᒃ, ᐅᑭᐅᒃᑯᑦ ᑰᒃᑯᑦ ᓯᑐᑎᓪᓗᒍ, ᑕᕐᕆᐅᕐᔪᐊᑉ ᐊᑯᐊᓂᒥᐅᑦᓴᔦᑦ ᒍᐃᒍᐃᒃᑯᑦ ᐃᖃᓗᓐᓂᐊᑏᑦ ᑖᕙᓂᖃᑦᑕᓯᒪᓕᕋᓗᐊᕐᑎᓗᒋᑦ ᕿᓚᓗᒐᕐᓂᐊᓱᑎᒃ ᐆᒐᕐᓂᐊᓱᑎᓪᓗ ᑖᕙᑦᓱᒪᐅᑉ ᐃᒪᖓᓂ ᐊᕐᕌᒍᐃᑦ ᖁᓖᑦ/ᑕᓪᓕᒪᐅᔪᕐᑐᐃᑦ ᐊᒥᓱᒐᓛᑦ ᐊᓂᒍᕐᓯᒪᓕᕐᑎᓗᒋᑦ.

ᑕᕆᐅᕐᔪᐊᑉ ᐊᑭᐊᓂ ᐱᓯᒪᔪᐃᑦ ᑮᓇᐅᔭᓕᐅᕋᓱᐊᕆᐊᕐᑐᓯᒪᑦᓱᑎᒃ ᓯᑦ-ᓯᐊᓪ-ᓕᐊᖃᑦᑕᓯᒪᔪᑦ ᐃᖃᓗᓐᓂᐊᕆᐊᕐᑐᓯᒪᑦᓱᑎᒃ ᐊᒻᒪᓗ ᐆᒪᔪᕕᓃᑦ ᐊᒥᖏᓐᓂᒃ ᒥᕐᖁᓕᓐᓂᒃ ᑕᕐᓰᖃᑦᑕᐅᑎᒍᑎᖃᕐᐸᓱᑎᒃ. 1679-ᒥ ᓗᐃ ᔪᐃᓕᐊᑦ ᓂᐅᕐᕈᓭᕕᓐᓂᒃ ᓇᑉᐯᓚᐅᕐᑐᕕᓂᖅ, ᑭᓯᐊᓂ ᐳᑎᔅ-ᒥᐅᑦ ᒍᐃᒍᐃᓂᒃ ᐅᓇᑕᕐᓱᑎᒃ ᓵᓚᖓᕐᒪᑕ, ᓂᐅ ᕗᕌᔅᒍᓂᕋᕐᑕᐅᓕᕐᑐᒥᒃ, ᖃᑦᓴᓐ ᐯ ᑲᒻᐸᓂᒃᑯᑦ ᐊᕐᓵᓂᓯᒪᔪᐃᑦ ᓂᐅᕐᕈᓭᓂᕐᒧᑦ ᐱᓇᓱᐊᕐᓂᐅᔪᓂᒃ. ᑖᓐᓇ ᓄᓇᓕᒃ 1885 ᐊᕐᕌᒍᖓ ᑭᓯᐊᓂ ᑎᑭᐅᑎᒻᒪᑦ ᓄᓇᓕᖕᖑᑎᑕᐅᓚᐅᕐᑐᕕᓂᖅ ᑲᕙᒫᐱᖕᖑᑎᑕᐅᑦᓱᓂ.

ᑌᑦᓱᒪᓂ ᓄᓇᒃᑯᑦ ᐊᕐᖁᓯᐅᕐᓯᒪᖕᖏᓂᖓᓂ, ᑖᓐᓇ ᓄᓇᓕᒃ ᐅᒥᐊᒃᑯᑦ ᐄᒐᕐᕕᑖᕆᐊᖕᖓᓂᕐᖁᖅ ᐊᕐᕌᒍᖅ 1908-ᖑᓕᕐᑎᓗᒍ. $ᓯᐊᓂᓕ ᓴᓇᔭᐅᓕᑐᐊᕐᒪᑦ ᑯᐯᒃ ᑕᕐᕋᖓᓃᓐᓂᓴᐅᓱᑦᓱᓂ ᖃᓪᓗᓈ ᓄᓇᖓᓐᓃᓂᕐᓴᖅ ᓛᐸᑐᐊᒧᓪᓗ ᓯᕝᕗᕕᐊᓪᒧᓪᓗ ᓄᓇᒃᑯᔫᑯᑖᑦ ᐊᕐᖁᓯᐅᕐᑕᐅᑎᓪᓗᒋᑦ 1950-ᒥᑦ 1954 ᑎᑭᑦᓱᒍ, ᐃᓄᖏᑦ ᐅᓄᕐᓯᓂᕐᖁᑦ ᑭᑭᐊᑦᓴᔭᒥᒃ ᐅᔭᕋᓐᓂᐊᓯᑐᐊᕐᒪᑕ ᓛᐸᑐᐊᒥ ᓄᓇᒃᑯᔫᑯᑖᒃᑯᑦ ᐊᐅᓪᓚᐅᔭᐅᖃᑦᑕᓯᑐᐊᕐᒪᑕ. ᑭᒍᓂᖏᒍᑦ ᑮᓇᐅᔭᓕᐅᕋᓱᒍᑎᐅᔪᑦ ᐃᓪᓗᒐᓴᕐᒥᒃ ᐊᓯᑦᔩᓚᕆᓕᕐᓂᖁᑦ ᐃᑎᔪᒦᑦᑐᒥᒃ ᐃᒫᒍᑦ ᐅᒥᐊᓄᑦ ᐄᒐᕐᕕᑕᕐᑕᐅᓂᖃᑐᐊᕐᒪᑦ, ᑭᓯᐊᓂ ᓯᓚᕐᔪᐊᒥ ᑭᑭᐊᑦᓴᔦᑦ ᐊᑮᕈᒋᐊᕐᓯᒪᓂᖏᑦ ᑕᒐᑕᒐᐅᓂᕐᓴᖅ ᐱᓇᓱᒐᕐᓂᓄᓗ ᐃᓄᖏᓐᓂᓗ ᐃᑭᓕᒋᐊᕆᒍᑎᐅᒪᕙᓕᕐᒥᔪᑦ, ᐄᒐᕐᕕᐊᓗᒃ ᑲᔪᓯᑦᓯᐊᖏᓐᓇᕋᓗᐊᕐᑎᓗᒍ.

ᐅᑭᐅᒃᑯᑦ ᓯᑐᕋᐅᓯᔭᕐᕕᐅᒍᓐᓇᑐᖅ ᐅᕝᕙᓗᓐᓃᑦ ᓵᑦᑐᔭᐅᑦᓱᓂ ᑐᒥᐅᔭᒧᑦ ᓂᑯᕐᕋᔪᓄᑦ ᓯᑐᕋᐅᑎᑦᓴᔭᒥᒃ ᐊᑐᕐᑐᒧᑦ ᓯᑐᕋᕐᕕᐅᒍᓐᓇᒥᑦᓱᓂ ᐅᖓᓯᑦᑑᖏᑦᑐᒥ ᐃᓪᓗᒐᓭᑦ ᓯᕿᓂᐅᑉ ᓂᐱᕝᕕᐊᓂ. ᓯᑦ-ᓰᓪᒦᓐᓂᓂᑦᑕᐅᖅ ᐅᒥᐊᒃᑯᑦ ᐋᓐᑎᑳᔅᑎᒧᑦ ᐃᓐᓂᐊᑐᑦᓴᐅᒥᑦᓱᑎᑦ ᑖᓐᓇ ᕿᑭᕐᑕᖅ ᐃᓄᒋᐊᑦᑑᓇᓂ ᐱᐅᓕᐊᕐᓯᓯᒪᕕᐅᔮᕐᒪᑦ ᑯᐯᒃ ᒍᐃᒍᐃᖏᑕ ᐊᑯᓂᐅᓕᕐᑐᖅ ᐱᐅᓯᕆᓯᒪᔭᖓᓂᒃ.