ᑕᓯᐅᔭᖅ

ᑕᓯᐅᔭᖅ ᑐᑭᖃᕐᑐᖅ “ᑕᓯᕐᔫᔮᕐᑐᒥᒃ” ; ᑖᓐᓇ ᐅᖃᐅᓯᖅ ᐊᑕᖏᕐᓯᔪᖅ ᑕᓯᕐᒥᒃ ᖃᒪᓂᕐᒥᒃ ᑕᓯᐅᔭᐅᑉ ᖃᒪᓂᖓ ᖃᐅᔨᒪᔭᐅᔪᖅ ᐅᓕᓪᓗᐊᓯᑎᐅᒋᐊᖓ ᑎᓂᕐᔪᐊᓱᖑᒋᐊᖓᓗ 15 ᒥᑌᑦ ᐅᖓᑖᓄᕐᑐᒥᒃ ᑎᓂᑉᐸᓱᓂ

ᓇᑦᓯᓕᒻᒪᕆᐊᓘᓲᖅ ᕿᓚᓗᒐᓕᐊᓘᓱᖑᑦᓱᓂᓗ, ᐃᖃᓗᑉᐱᓕᒻᒪᕆᐅᑦᓱᓂᓗ, ᐊᑦᓛᓐᑎᒃ ᐃᒪᕐᐱᖓᓂᒥᐅᔭᓂᒃ ᓵᒪᓕᒻᒪᕆᐊᓘᑦᓱᓂᓗ, ᓄᑎᓪᓕᓕᐊᓗᑦᓱᓂᓗ, ᒥᑎᕐᓂᓗ ᐊᒥᓱᑲᓪᓛᓗᓐᓂᓗ ᐃᒪᕐᐱᒥᐅᑕᓂᒃ ᑎᒻᒥᐊᖃᓲᖑᑦᓱᓂ, ᓄᓇ ᐅᒥᒻᒪᖃᓲᒍᒻᒥᔪᖅ 1,000 ᒥᑦᓯᑎᓐᓃᑐᓂᒃ ᐅᓄᕐᓂᖏᑦ ᑖᕙᑦᓱᒪᐅᑉ ᒥᑦᓵᓃᓲᓂᒃ. ᐊᒻᒪᓗ ᑭᒡᒐᕖᑦ ᕿᓐᓄᐊᔪᐊᓪᓗ ᑕᓯᐅᔭᐅᑉ ᑲᒪᓂᖓᓂ ᖃᕐᙯᑦ ᐃᓐᓈᕈᖏᓐᓂ ᐅᓪᓗᓕᐊᕐᓯᒪᓲᖑᑦᓱᑎᒃ.

ᒍᐃᒍᐃᑦ ᑲᒻᐸᓂᒃᑯᖏᑦ ᐊᒻᒪᓗ ᖃᑦᓴᓐ ᐯ ᑲᒻᐸᓂᒃᑯᑦ ᑕᒪᕐᒥᒃ ᓂᐅᕕᕐᕕᒥᓂᒃ ᐅᒃᑯᐃᓯᓚᐅᕐᑐᕕᓃᒃ 1905-ᒥ 1907-ᒥᓗ, ᐅᓪᓗᒥ ᓄᓇᓕᐅᑉ ᑕᓯᐅᔭᐅᑉ ᓯᕿᓂᐊᑕ ᓄᐃᕕᐊᓂ. ᑖᕙᓂ ᓂᐅᕕᕐᕕᒥᓂᒃ ᓇᑉᐯᓚᐅᕐᑐᕕᓃᑦ ᐃᓛᓂᑦ ᕿᒧᑦᓯᑐᓄᑦ ᐊᕐᖁᑎᐅᓲᒍᓯᒪᒻᒪᑦ ᐃᓄᓐᓄᑦ ᑰᑦᔪᐊᓕᐊᕐᑐᓄᑦ ᑲᖏᕐᓱᒥᑦ ᐅᑎᒧᓪᓗ. ᑕᒪᕐᒥᒃ ᓂᐅᕕᕐᓂᐊᕖᒃ ᐅᒃᑯᓚᐅᕐᑐᕕᓃᒃ 1935-ᖑᓕᕐᑎᓗᒍ, ᕿᒪᑦᑕᐅᔪᐃᑦᑑᓂᐊᓕᕐᓗᓂ ᓄᓇᓕᖕᖑᑕᐅᓯᒪᑦᔭᖏᑦᑐᖅ ᓂᐅᕕᕐᓂᐊᕕᖃᕐᕕᕕᓂᖓ.

ᑲᕙᒪᑐᖃᒃᑯᑦ ᑰᒃᔪᐊᒥ ᐃᓕᓐᓂᐊᕕᒻᒥᒃ ᐅᒃᑯᐃᓯᑐᐊᕐᒪᑕ ᐊᒻᒪᓗ ᐃᓄᓕᕆᓂᑦᑎᒍᑦ ᐱᑦᔪᔨᒍᑎᑦᓴᓂᒃ ᐅᑯᐃᓯᑐᐊᕐᒪᑕ, ᐊᒥᓱᑲᓪᓛᓗᐃᑦ ᐃᓄᑐᐃᓐᓀᑦ ᓄᐊᓯᓚᐅᕐᓯᒪᔪᑦ ᑕᒡᒍᖓ ᓄᓇᓕᒻᒧᑦ ᐱᕙᓪᓕᐊᕕᐅᓯᑐᐊᕐᒪᑦ ᓱᓇᑐᐃᓐᓇᓂᒃ. ᑌᒣᒐᓗᕐᑎᓗᒍ ᐆᒪᔪᖃᑦᓯᐊᖏᓐᓂᑯᖓᓄᑦ ᑌᑦᓱᒪᓂ ᐃᓄᐃᑦ ᓂᕿᑦᓴᖏᓐᓂᒃ ᑌᒣᒻᒪᑦ ᐊᒥᓱᐃᑦ ᐃᓄᐃᑦ ᑲᕙᒪᒃᑯᓂᒃ ᓱᖏᕐᑑᑎᖃᖔᓯᔪᕕᓃᑦ ᐃᑲᔪᕐᓯᐅᑎᒋᓲᖏᓐᓂᒃ ᑮᓇᐅᔭᓂᒃ. ᑌᒣᓕᕐᒪᑕ ᐱᐅᓯᐅᒥᒋᐊᕐᑎᓯᒐᓱᕐᓱᑎᒃ 1963-ᒥ ᑯᐯᒃ ᑕᕐᕋᖓᓂ ᐊᐅᓚᑦᓯᔨᖏᑦ ᑯᐯᒃ ᑲᕙᒪᒃᑯᑦ ᓇᑉᐯᓚᐅᕐᑐᕕᓃᑦ ᑕᓯᐅᔭᐅᑉ ᓯᕿᓂᐊᑕ ᓯᓈᓂ ᐆᒪᔪᖃᕐᓂᓴᒧᑦ.

1966-ᖑᓕᕐᑎᓗᒍ ᓯᕗᓪᓕᐹᒥ ᐃᓄᐃᑦ ᑲᕙᒪᒃᑯᑦ ᓄᓇᓕᖕᖑᕋᓱᐊᕐᑕᖓᓂᒃ ᓈᒻᒪᓴᓚᐅᕐᓂᖏᑦᑐᑦ, ᐃᓚᒌᖑᓈᕐᑎᑐᐃᑦ ᑐᑭᑖᖃᑎᒋᑦᓯᐊᒪᑕ ᑭᓯᐊᓂ ᓄᓇᒋᒍᒪᒥᓂᒃ, ᑐᑭᑖᕐᑕᐅᓚᐅᕐᑐᕕᓂᖅ ᓇᓪᓕᑳᕆᑐᐊᕐᒪᑕ ᐃᒪᕐᒧᑦ ᖃᓂᖕᖏᑑᓪᓗᐊᔭᖏᑦᑐᒥᒃ. ᓄᓇᓕᒃ ᓄᑖᖅ ᐃᓂᓪᓚᑕᐅᒪᑦᓯᐊᓕᕐᒪᑦ, 1971-ᒥ ᑯᐊᐸᒃ ᓂᐅᕕᕐᓂᐊᕕᒃ ᓄᐃᑕᐅᓕᓚᐅᕐᓯᒪᔪᖅ ᓄᓇᕐᖃᑎᒌᓄᑦ. ᓄᓇᕕᓕᒫᒥ ᐃᓚᒌᓴᒧᑦ ᑯᐊᐸᖓ ᐃᓚᐅᖕᖏᑐᑐᐊᑦᓯᐊᖅ.

ᑕᑯᔭᐅᒍᓐᓇᑐᖅ ᓯᓚᕐᔪᐊᓕᒫᒥ ᑎᓂᓪᓗᐊᓲᒍᓂᖓ ᑕᓯᐅᔭᐅᑉ. ᐊᕐᕌᒍᓕᒫᒥ ᐆᒪᔪᕐᓂᐊᕕᑦᓴᓯᐊᖅ ᐃᖃᓗᑉᐱᓂᓪᓗ ᐃᖃᓗᓐᓂᐊᕕᑦᓴᓯᐊᖑᑦᓱᓂ ᐅᐱᕐᖔᖑᓕᑐᐊᕐᒪᑦ/ᐊᐅᔭᐅᓕᑐᐊᕐᒪᑦ.

ᐊᑦᔨᓕᐅᕐᑐᕕᓂᖅ/ᐊᑦᔨᓕᐅᑐᕕᓃᑦ: Joeleusi Annanack