ᐅᒥᐅᔭᖅ

ᐃᖏᕐᕋᓂᖓ ᓲᔪᐊᓗᒻᒪᑦ ᖁᐊᓚᐅᕐᓯᒪᑦᔭᖏᑦᑐᖅ. ᑕᓯᐅᔭᐅᑉ ᓯᑦᔭᖓᑦᑕ ᓯᓈᓂ ᓯᐅᕋᔮᑐᐃᓐᓇᖅ ᖃᕐᖃᖃᕐᓱᓂᓗ ᓄᕝᕗᕆᑦᑑᒋᐊᖏᑦ ᑕᑯᑦᓴᐅᓯᐊᓂᒃ. ᑰᑦᑐᐃᑦ ᑕᓯᐅᔭᕐᔪᐊᒧᑦ ᐃᒪᖓᓂᒃ ᕿᕐᓂᑕᐅᒃᑰᐃᔪᑦ, ᑭᓯᐊᓂ, ᐃᓯᐅᕋᓗᑦᑖᓕᐊᓗᒃ ᐊᒻᒪᓗ ᑲᐱᓯᓕᓐᓂᒃ/ᑲᕕᓯᓕᓐᓂᒃ, ᓇᑦᓯᓂᓪᓗ ᐊᒻᒪᓗ ᕿᓚᓗᒐᕐᓂᒃ.

ᐃᒪᕐᒥᒃ ᑕᕆᐅᕐᒥᒃ ᐊᕙᑎᒥᐅᑕᖃᕋᒥ ᓄᓇᖓ ᓇᓂᑐᐃᓐᓈᓚᑳᑦᑐᓂᒃ ᓇᐹᕐᑐᓄᑦ ᐱᖏᕐᓄᓗ ᐱᕈᕐᕕᐅᓲᖅ, ᑕᓯᐅᔭᐅᑉ ᓯᕿᓂᖓᓂ ᖃᑦᓴᓐ ᐯ ᑲᒻᐸᓂᒃᑯᓄᑦ ᕿᒣᓐᓇᑕᐅᓂᑯᒃ ᓂᐅᕕᕐᕕᕕᓂᖅ ᓇᐹᖏᓐᓈᑐᖅ.

ᑕᓯᐅᔭᐅᑉ ᐃᓐᓈᕈᖏᓐᓂ ᓇᓯᑦᓱᓂ ᑕᑯᒥᓇᕐᑐᒪᕆᐊᓗᒥᒃ ᑕᑯᓐᓈᓇᕐᑐᖅ ᑕᓯᐅᔭᕐᔪᐊᑉ ᓯᕿᓂᖓᑕ ᓂᐱᕝᕕᐊᓂ ᓵᖕᖓᓱᓂ ᐊᒻᒪᓗ ᐸᑎᕐᑑᑉ ᐃᓐᓇᓖᑦ ᑕᑯᑦᓴᐅᓱᑎᒃ. ᑐᓪᓖᑦ, ᒥᑎᓪᓗ ᐊᒻᒪᓗ ᑭᒡᒐᕖᑦ ᑕᒫᓂ ᒪᓐᓂᓕᐅᕐᒥᖃᓲᑦ ᐅᓪᓗᓕᐅᕐᓯᒪᑦᓱᑎᒃ ᐊᐅᔭᐅᓕᑐᐊᕐᒪᑦ/ᐅᐱᕐᖔᖑᓕᑐᐊᕐᒪᑦ. ᐸᑎᕐᑑᖅ ᐅᒥᐅᔭᐅᑉ ᑕᕐᕋᖓᓂ ᐅᖓᓯᓐᓂᖃᕐᑐᖅ 30 ᑭᓛᒥᑕᓄᑦ ᓄᓇᓕᒻᒥᑦ ᐊᒻᒪᓗ 30 ᒦᑕᓂᒃ ᑭᖏᓐᓂᓕᒻᒥᒃ ᖁᓪᓗᑐᐊᓗᑦᑕᖃᕐᓱᓂ ᑲᑕᑦᑐᑲᓪᓚᒥᒃ ᑰᑦᑐᖓ ᐸᑎᕐᑑᑉ.

ᐃᓄᐃᑦ ᐊᖏᖃᑎᒌᒐᓱᐊᕐᓂᖃᕐᓱᑎᒃ ᐊᓪᓚᓯᒪᔪᕐᑕᓯᔭᐅᑎᑦᓯᓚᐅᕐᓯᒪᕗᑦ ᑌᑦᓱᒪᓂ ᔦᒥᔅ ᐯᒥ ᑯᐯᒃᓗ ᑕᕐᕋᖓᓂ 1975-ᒍᑎᓪᓗᒍ ᐊᖏᖃᑎᒌᒍᑎᐅᓯᒪᔪᒥ ᑰᑦᔪᐊᕌᐱᒻᒥᐅᑦ ᑕᓯᐅᔭᒧᑦ ᓅᒐᔭᕐᑎᓗᒋᑦ. 1982-ᒥ, ᐃᓄᓕᒫᑦ ᓂᕈᐊᕐᓂᖃᕐᑎᑕᐅᑦᓱᑎᒃ ᑐᑭᑖᓛᕐᓯᒪᔪᑦ ᓄᓇᓕᓕᐅᓛᕆᐊᒥᒃ ᐃᓄᑐᐃᓐᓀᑦ ᐱᐅᓯᑐᖃᖏᓐᓂᒃ ᐱᐅᓕᑦᓯᒍᒪᒧᑦ ᑖᕙᓂ ᓄᓇᒥ ᐃᖃᓗᖃᑦᓯᐊᑐᒥ ᐆᒪᔪᖃᑦᓯᐊᓱᓂᓗ ᐅᓚᐱᑕᐅᓂᐅᔭᖕᖏᑐᒥ ᐃᑯᒪᓐᓂᐊᑎᓄᑦ ᐃᑯᒪᓕᐅᕐᕕᐅᓂᐅᔭᕿᖕᖏᑐᒥ. ᐊᒥᓱᕕᑦᓱᑎᒃ ᐃᑦᓴᓂᑕᕐᓂᐊᑏᑦ ᐃᑦᓴᓂᑕᕐᓂᐊᕆᕐᓯᒪᓕᕐᒪᑕ ᓄᓇᒥᓗ ᖃᐅᔨᓴᕐᓱᑎᒃ ᐸᕐᓀᒋᕐᓯᒪᑦᓯᐊᓕᕐᒪᑕ, ᐃᓪᓗᕈᐊᑦ/ᐃᓪᓗᔪᐊᑦ ᓴᓇᔭᐅᕙᓪᓕᐊᓯᓚᐅᕐᓯᒪᔪᑦ 1985-ᒥ ᐊᒻᒪᓗ ᓄᕐᖃᓱᑎᒃ ᑏᓯᑉᐸ 1986-ᒥ, ᐃᓪᓗᕈᐊᑦ/ᐃᓪᓗᔪᐊᑦ ᓴᓇᔭᐅᓂᖏᓐᓂᒃ ᐃᓄᐃᑦ ᐊᖁᐃᒪᕕᖃᕐᓯᒪᔪᑦ ᓴᓇᕕᐅᔪᒥ ᓄᓇᓕᓕᐊᒍᔪᒥ ᓄᑖᒥ.

ᑕᑯᓂᐊᕋᑦᓴᓯᐊᖅ ᖃᓯᒋᐊᓕᐅᑉ ᑕᓯᖓ, ᑯᐯᒃ ᓄᓇᒻᒪᕆᖁᑎᖓᓂ ᑕᓯᓕᒫᓄᑦ ᐊᖏᓂᕐᐹᓄᑦ ᐱᖓᔪᒋᔭᐅᔪᖅ, ᐊᓪᓕᖓᓗ ᓇᑦᓯᓕᒃ ᑕᓯᖅ, ᓇᑦᓯᑕᖃᕐᓱᑎᒃ ᐃᒪᑦᓯᐊᒥᒋᐊᒥᒃ ᓱᖏᐅᑎᓯᒪᔪᓂᒃ. ᐅᒥᐅᔭᐅᑉ ᑲᕙᒫᐱᒃᑯᖏᑦᑕ ᐊᓪᓚᕕᖓᓂ, ᐃᓄᐃᑦ ᐱᐅᓯᑐᖃᕐᒥᒍᑦ ᓴᓇᕐᕈᑎᓕᐊᕕᓂᖏᓐᓂᒃ ᓄᐊᑕᐅᓯᒪᔪᓂᒃ ᑕᑯᓂᐊᕈᓐᓇᒥᔪᓯ ᐃᑦᓴᓂᑕᕐᓂᓗ ᑕᑯᔭᐅᔪᕕᓂᕐᓂᒃ ᐃᑦᓴᓂᑕᕐᓂᐊᑏᑦ ᓴᒡᒐᑎᓪᓗᒋᑦ ᐃᓪᓗᕈᐊᑦ/ᐃᓪᓗᐊᔪᐊᑦ ᓴᓇᔭᐅᒋᐊᓚᐅᕐᑎᓇᒍ ᐅᒥᐅᔭᐅᑉ ᓄᓇᓕᖓ.

ᐊᑦᔨᓕᐅᕐᑐᕕᓂᖅ/ᐊᑦᔨᓕᐅᑐᕕᓃᑦ : Alexis Beaulieu